Extrait de notre magazine trimestriel "Vérité et Espérance/ Pâque Nouvelle"
(n° 93, Noël 2014)
CESTE NUICT TANT HEUREUSE
I
Ceste nuict tant heureuse
Et pleine de soulas
Chose miraculeuse
Est advenue en bas
Car c'est chose certaine
Qu'en ceste saincte nuict
Est naquist de la Vierge
Le Sauveur Jesus-Christ.
II
Ceste Vierge benigne
Par son humilité
A esté trouvee digne
De la divinité
Elle a esté esleue
Pour nostre saulvement
Et est demeuree Vierge
Perpetuellement.
III
Les Saints Anges Celestes
De Dieu sont envoyés
Annoncer les nouvelles
Aux pauvres desolés
Disoient en leurs cantiques
Gloire a Dieu exalté
Et paix en terre aux hommes
De bonne volonté.
IV
Prenez resjouissance
O pauvres pastoureaux
Vivant en esperance
Chantez Noëls nouveaux
Allez voir vostre maistre
Dans un petit hostel
Ainsi a voulu naistre
Le Doux Emmanuel.
V
Les pasteurs de Judee
Gardoient leurs moutons
Voyant la nuict si claire
Tous estonnés estoient
Se disoient l'ung a l'aultre
Mon amy qu'est ceci ?
Pour moy je croy sans doute
Que c'est nostre desir.
VI
Voila une armonie
Des anges glorieux
Oncques jour de ma vie
Je ne fus si joyeux
Cela me resconforte
Et me rend tout content
D'ouyr chose si doulce
Du Roy du Firmament.
VII
Allons donc je vous prie
A Bethleem tout droit
Ne craignons ni la pluie
Ni le vent ni le froid
Et la nos bergeries
Laissons-les pasturer
Toutes en la prairie
Et l'allons adorer.
VIII
Trestons d'une alliance
Faisons nostre devoir
Portons-luy reverence
Chascun a son pouvoir
Avecques nos houlettes
Aussi nos flageolets
Solennisons la feste
Du fils Dieu eternel.
IX
Entrant dedans l'estable
Ont vu une clarté
Ung rayon de sa face
Plus clair que le soleil
A genoux se prosternent
Adorant leur Seigneur
Qui gisait en la creche
Entre l'asne et le bœuf.
X
Nous vous prions o Prince
Prince sur toutes gens
Prenez en gré l'humblesse
De nos petits moyens
Car pour vous faire offrande
N'avons que nos jouetz
Mais nos corps et nos ames
Sont a vous s'il vous plaist.
XI
Trois roys d'estranges terres
Y vinrent promptement
Sur de grands dromadaires
Des pays d'Orient
En chemin se rencontrent
Par le vouloir de Dieu
Et d'un accord s'assemblent
Pour venir jusqu'au lieu.
XII
Ils ont trouvé la Vierge
Tenant son cher enfant
Auquel ont fait hommage
D'or de myrrhe et d'encens
Luy prient par sa clemence
Qu'ils leur doint retourner
En leur pays estrange
Et sans aucun danger.
XIII
Or prions donc Marie
De cœur devotement
Que pour nous elle prie
Jesus son doux enfant
Qu'il nous fasse la grace
De si bien luy servir
Que tout soyt a sa gloire
Et nous doint Paradis.
Amen.
Vieux Noëls
La Roche-sur-Yon.